Monitorimi aktiv është një opsion i menaxhimit të kancerit të prostatës të lokalizuar. Më konkretisht, kjo strategji përdoret për burrat me kancer prostate të gradës së ulët dhe risk të favorshëm ose mesatar. Në këtë kategori bëjnë pjesë burrat me kancer prostate me Gleason 3+3 dhe në disa raste edhe Gleason 3+4.

Strategjia e monitorimit aktiv përfshin analizën e PSA cdo 6 muaj, rezonancën magnetike (MRI) të prostatës cdo 1 ose 2 vjet dhe biopsi të prostës deri në 2-3 vjet.

Qëllimi i ndjkjes aktive është të shtyjë trajtimin dhe të monitorojë ngushtësisht pacientët, në mënyrë që nëse do të jetë i nevojshëm trajtimi, të aplikohet në kohë.

Në këtë mënyrë, avantazhi i monitorimit aktiv është shtyrja e trajtimeve radikale si kirurgjia ose trajtimi me radioterapi. Ndërsa e meta e kësaj strategjie është ankthi qe vjen me ndjekjen aktive, kryesisht i lidhur me kryerjen e biopsive.

Rezultatet nga nje studim i madh – studimi ProtecT, në të cilin morën pjesë më shumë se 82.000 burra te depistuar për kancer prostate, nga viti 1999 deri ne vitin 2009, kanë treguar se pavarësisht zgjedhjes së tyre fillestare për trajtimin (kirurgji, rrezatim ose monitorim aktiv), të gjithë pacientët kanë patur probabilitet të lartë për rezultate të mira nga menaxhimi i sëmundjes.

Monitorimi aktiv paraqet një strategji adekuate menaxhimi, duke mundësuar për rreth 75% të burrave me kancer të lokalizuar të prostatës të shtyjnë trajtimin radikal per më shumë se 10 vjet.

Mbani mend:

• Monitorimi aktiv është një strategji e menaxhimit të kancerit të prostatës në rastet kancerit të prostatës me gradë të ulët, me risk të favorshëm ose mesatar.

• Pacientët përzgjidhen në bazë të biopsisë, ekzaminimit objektiv dhe të dhënave imazherike.

• Avantazhi i monitorimit aktiv është shtyrja e trajtimeve radikale.

• Disavantazhi i monitorimit aktiv është ankthi dhe nevoja e ndjekjes me biopsi.