Një trajtim i ri për kancerin e avancuar të prostatës është aprovuar nga FDA në Mars të vitit 2022. Ky medikament, transporton një dozë të vogël rrezatimi të lidhur me një molekulë që lidhet specifikisht me qelizat e kancerit të prostatës.

Terapia Lu-PSMA është e aprovuar për pacientët me kancer prostate metastatik kastracion-rezistent, të cilët janë trajtuar me linja të tjera trajtimi si terapia anti-androgjenike dhe kimioterapi me bazë taksanesh. Kriteri tjetër që duhet të plotësojnë pacientët për të marrë këtë medikament është të kenë një skaner PSMA PET pozitiv.

Si funksionon Lu-PSMA?

Lu-PSMA lidhet me targetin e tij, PSMA-në që gjendet në qelizat e kancerit të prostatës. PSMA është një proteinë që gjendet thuajse në të gjitha qelizat e kancerit të prostatës dhe mungon në qelizat e indit normal. Molekula e PSMA lidhet me një ngarkesë radioaktive të quajtur lutetium-177. Kur Lu-PSMA lidhet me targetin në qelizën tumorale, ngarkesa radioaktive eliminon qelizën tumorale, pa ndikuar në qelizat e shëndetshme.

Aprovimi i kësaj terapie është bazuar në studimin ndërkombëtar të fazës 3, VISION, i cili tregoi se trajtimi me Lu-PSMA zgjat jetën e pacientëve më kancer të avancuar prostate, redukton progreisn e sëmundjes dhe ruan një cilësi të mirë të jetës.

Studime të tjera janë duke u kryer për të vlerësuar efektin e Lu-PSMA në stade më të hershme të kancerit të prostatës dhe në kombinim me trajtime të tjera, si imunoterapia.

Kush mund të trajtohet me Lu-PSMA?

Lu-PSMA është e parovuar për përdorim në tumoret PSMA-pozitive, cke e bën një lloj trajtimit preciz. Pozitiviteti i tumorit për PSMA konfirmohet me anë të skanerit PSMA PET, i cili është aprovuar në vitin 2020.

Aktualisht, janë dy lloje PSMA PET skaner të aprovuar nga FDA. Njëri prej tyre përdor gallium-68-PSMA-11 (Locametz® dhe Illuccix®) dhe llojji tjetër përdor piflufolastat F 18 (PYLARIFY®). Sipas aprovimit të FDA, pacientët duhet të kenë pozitiv skanerin me gallium-68-PSMA-11 për t`u kualifikuar për trajtim me Lu-PSMA.