Të dhënat e publikuara së fundmi në ESMO konfirmuan rëndësinë e inhibitorëve të checkpoint dhe VEGF në trajtimin e kancerit metastatik të qafës së mitrës.

Studimi i fazës III BEATcc tregoi benefitin që sjellë kombinimi i atezolizumabit me bevacizumabin dhe kimioterapinë si trajtim i linjës së parë në kancerin metastatik ose rekurrent te qafës së mitrës.

Në këtë studim, pacientët u ndanë në mënyrë rastësore në dy grupe. Grupi i parë përfshinte pacientë të trajtuar me atezolizumab + bevacizumab + kimioterapi (N:206), ndërsa grupi i dytë përfshinte pacientë të trajtuar me bevacizumab + kimioterapi + placebo (N:204). Dy qëllimet kryesore të studimit ishin vlerësimi i mbijetesës së lirë nga progresi (PFS) dhe i mbijetesës së përgjithshme (OS). Nga rezultatet u vu re se, si PFS edhe OS ishin të përmirësuara në grupin e pacientëve të tratjuar me atezolizumab + bevacizumab + kimioterapi (PFS [HR] 0.62; 95% [CI] 0.49–0.78; p<0.0001 dhe OS; HR 0.68; 95% CI 0.52–0.88; p=0.0046).

Për pacientët në grupin e atezolizumabit, OS ishte 32.1 muaj me përgjigje objektive (ORR) në 84% të rasteve krahasuar me 22.8 muaj dhe ORR 72% në grupin e trajtuar me placebo. Efektet anësore të gradës ≥3 u raportuan në 79% të pacientëve të trajtuar me atezolizumab dhe 75% të pacientëve të trajtuar me placebo.

Në vitet e fundit, trajtimi i kancerit të qafës së mitrës është përmirësuar me shtimin e e terapive të reja si bevacizumabi (studimi GOG 240) dhe pembrolizumabi (studimi KEYNOTE-826), duke sjellë thuajse dyfishim të mbijetesës së përgjithshme.

BEATcc është një studim i rëndësishëm i cili konfirmon rëndësinë e shtimit në trajtimin e kancerit metastatik të qafës së mitrës edhe inhbitorët e checkpoint, përvec bevacizumabit.