Në një studim të madh në nivel popullate, ekspozimi ndaj antibiotikëve, specifikisht ndaj fluorokinoloneve para trajtimit me imunoterapi – inhibitorë të checkpoint (ICI) është lidhur me mbijetesë të përgjithshme (OS) më të ulët, duke rritur mortalitetin me deri në 65%.

Ky korrelacion është parë ndër pacientët që kanë marrë trajtim me barna anti-PD1 për trajtimin e kancerit të mushkërisë dhe melanomës. Gjetjet janë publikuar në Shkurt 2023 në Journal of Clinical Oncology.

Studimet preklinike kanë treguar se diversiteti i florës bakterialë në traktin digjestiv mund të ndikojë në mënyrë të drejtëpërdrejtë në efikasitetin e ICI dhe në efektet anësore nga trajtimi me imunoterapi.

Studime të tjera, përfshirë dy rishikime sistematike të literaturës dhe meta-analiza, kanë treguar se ekspozimi ndaj antibiotikëve mund të ndikojë negativisht efektin nga trajtimi me ICI.

Qëllimi i këtij studimi retrospektiv ishte vlerësimi i lidhjes së përdorimit të mëparshëm të antibiotikëve me mbijetesën e përgjithshme (OS) në pacientët e trajtuar me ICI.

Pacientët e përfshirë në studim dhe rezultatet

Pacientët e përfshirë në studim ishin pacientët me kancer, të moshës >65 vjeç, që kanë filluar trajtim me ICI nga Qershori 2012 deri në Tetor 2018 në Ontario, Kanada. Nga 2,737 pacientë me kancer që janë trajtuar me ICI, 59% kanë marrë trajtim me antibiotik brenda 1 viti nga fillimi i trajtimit me ICI dhe 19% janë trajtuar me antibiotikë 60  ditë para fillimit të trajtimit me ICI.

Ekspozimi ndaj antibiotikëve brenda 1 viti nga fillimi i trajtimit me ICI lidhej me OS më të ulët (aHR 1.12; 95% [CI] 1.12 to 1.23; p = 0.03). Na analizën e klasës së antibiotikëve, ekspozimi ndaj flurokinoloneve brenda 1 viti (aHR 1.26, 95% CI 1.13 to 1.40; p < 0.001) ose 60 ditë (aHR 1.20, 95% CI 0.99 to 1.45; p = 0.06) nga fillimi i trajtimit me ICI ishte i lidhur me OS më të ulët.

Konkluzioni i studimit

Rezultatet e studimit sugjerojnë se klinicistët duhet të konsiderojnë ekspozimin ndaj antibiotikëve brenda një viti nga fillimi i trajtimit me ICI. Më shumë të dhëna janë të nevojshme për të eksploruar më tej lidhjen e përdorimit të antibiotikëve me efektin e ICI.