Çfarë janë limfomat?

Limfoma është një kancer i sistemik limfatik, i cili ka për funksion mbrojtjen e organizmit. Sistemi limfatik përfshin nyjet limfatike (limfonodujt), lienin (shpretkën), timusin dhe palcën e kockave. Limfoma mund të prekë të gjithë zonat e përmendura përfshirë edhe organe të tjera të trupit.

Dy nëngrupet kryesore të limfomave janë:

Limfoma Hodgkiniane
Limfoma jo-Hodgkiniane

Trajtimi i limfomës varet nga lloji i limfomës, stadi dhe agresiviteti i sëmundjes. Ndër trajtimet e mundshme të limfomës mund të jenë kimioterapia, imunoterapia, rrezatimi, transplanti i palcës së kockës ose një kombinim i këtyre.

Simptomat e limfomës

Shenjat dhe simptomat e limfomës mund të jenë:

Zmadhim i padhimbshëm i gjendrave limfatike (limfonodujve) në qafë, në sqetull ose në zonën inguinale.
Lodhje e vazhdueshme
Temperaturë
Djerësitje natën
Vështirësi në frymëmarrje
Humbje në peshë e pashpjegueshme
Kruarje

Çfarë i shkakton limfomat?

Shkaku i limfomave nuk është plotësisht i njohur. Ajo çka dihet është se sëmundja fillon nga qelizat e bardha të gjakut, të njohura si limfocite, te cilat mund të pësojnë një mutacion gjenetik që e bën qelizën të shumohet shpejt dhe në mënyrë të pakontrolluar.

Çfarë na bën më të rrezikuar për të zhvilluar një limfomë?

Faktorët që rrisin riskun për limfomë janë:

Mosha: Disa lloje limfomash janë më të shpeshta në moshë të re, ndërsa lloje të tjera diagnostikohen më shpesh në persona mbi 55 vjeç.

Gjinia: Burrat kanë rrezik më të lartë se gratë për të zhvilluar limfoma., edhe pse kjo diferencë nuk është e madhe.

Çrregullime të sistemit imunitar: Limfomat janë më të shpeshta të në personat që sistemi i tyre imunitar është i frenuar për arsye të ndryshme, psh. për shkak të përdorimit të barnave imunosupresore.

Infeksionet: Disa lloje infeksionesh rrisin riskun për limfoma. Ndër to mund të përmendim, infeksionin me virusin Epstein-Barr dhe infeksionin me Helicobacter pylori.

Si diagnostikohet limfoma?

Diagnostikimi i limfomës nis me një ekzaminim fizik nga mjeku, i cili vlerëson të gjithë stacionet limfatike, në qafë, në sqetull, në zonën inguinale si dhe vlerëson madhësinë e lienit dhe mëlçisë.

Për të konfirmuar diagnozën është e rëndësishme të kryhet një biopsi e limfonodulit. Metoda e preferuar është biopsia ekscizionale, pra heqja e plotë e limfonodulit dhe ekzaminimi në mikroskop, por në raste specifike mund të kryhet edhe biopsia me age.

Ndër ekzaminime të tjera të nevojshme për përcaktimin e diagnozës janë analizat e gjakut, ekzaminime imazherike si CT skaneri, MRI dhe PET-CT, si dhe biopsia e palcës së kockës.

Në varësi të situatës, mjeku mund të kërkojë ekzaminime shtesë. Ekzistojnë shumë lloje limfomash dhe përcaktimi i llojit të saktë është kyç në vendosjen e planit të trajtimit.