Mbijetesa e përgjithshme në pacientët me kancer kolorektal metastatik me prezencë të mutacionit BRAF është më e ulët se në tumoret pa prezencën e mutacionit.

Cila është sinjifikanca klinike e mutacionit BRAF V600E?

Janë tre klasa të mutacionit BRAF: Klasa I, klasa II dhe klasa III. Klasa I nxit aktivitetin e kinazave BRAF duke shkaktuar aktivizimine kaskadës së MAPK. Roli i klasave II dhe III si faktorë prediktivë të inhibitorëve të BRAF nuk është plotësisht e qartë. Mutacioni BRAF V600E është i shprehur në 10% të pacientëve me kancer kolorektal metastatik dhe mbart një prognozë më pak të favorshme. Edhe pse prezenca e instabilitetit mikrosatelit (MSI) ka një ndikim pozitiv, duhet patur parasysh se BRAF V600E është gjithmonë një faktor i keq prognostik edhe në tumoret me nivel të lartë instabiliteti mikrostatelit (MSI-H).

Për sa i përket mbijetesës së përgjithshme (OS), bazuar në disa studime të fundit, OS ka qenë rreth 18-20 muaj, veçanërisht në tumoret me stabilitet mikrostatelit (MSS). Pra, është e qartë që mbijetesa e përgjithshme është sa gjysma e asaj në pacientët pa mutacion të BRAF, në të cilët OS është rreth 20-40 muaj.

Si e ndikon qasjen kirurgjikale mutacioni i BRAF?

Në përgjithësi kirurgjia me metastazektomi nuk rekomandohet në pacientët me prezenzë të mutacionit BRAF. Megjithatë, në vitet e fundit, me inkorporimin e statusit të MSI, më shumë pacientë me këtë mutacion po i nënshtrohen kirurgjisë. Skenari kur kirurgjia është një opsion për këta pacientë është në rastin e metastazës unike në hepar dhe cilësimin e sëmundjes si oligometastatike. Edhe pse ky është një skenar i rrallë, pasi shumica e pacientëve me këtë mutacion shpesh kanë diseminim limfonodal, hepatik dhe peritoneal.

Kur duhet të kryhet analiza e BRAF?

Të gjithë pacientët me kancer kolorektal metastatik duhet të kryejnë analizën e BRAF. Analiza kryhet në mostrën e biopsisë dhe duhet të përfshijë edhe statusin e MSI dhe mutacionet RAS. Testimi mund të bëhët edhe me biopsi likuide, edhe pse deri më tani ky testim është në faza eksperimentale.

Kur përdoren terapitë me inhibitorë të BRAF/EGFR?

Studimi BEACON tregoi benefit në mbijetesë nga trajtimi me kombinimin e encorafenib – cetuximab, çka solli dhe aprovimin e kësaj skeme trajtimi në linjë të dytë për kancerin kolorektal metastatik BRAF V600E pozitiv. Megjithatë ky trajtim nuk është i rimbursuar në shumë shtete, përfshirë edhe Shqipërinë. Studimi ka treguar se pavarësisht llojit të trajtimit sistemik në linjën e parë (kimioterapi ose imunoterapi), kalimi në linjë të dytë më encorafenib – cetuximab përmirëson efektet e trajtimit.

• Mutacioni BRAF është i shprehur në 8-12% të rasteve me kancer kolorektal metastatik.

• Testimi për mutacionoin BRAF duhet të kryhet në të gjithë pacientët me kancer kolorektal metastatik para fillimit të trajtimit, shoqëruae me testimin për MSI dhe mutacionet RAS.

• Encorafenib – cetuximab rekomandohet si skemë e trajtimit për linjë të dytë pas kimioterapisë ose imunoterapisë (MSI-H) në pacientët me mutacion të BRAF.