Retinopatia diabetike dhe kontrolli i syve janë dy probleme që shkojnë paralel. Retinopatia diabetike është një gjendje e syve që mund të shkaktojë humbje të shikimit dhe verbëri te njerëzit që kanë diabet. Cilësohet si një nga ndërlikimet më të rënda të diabetit të sheqerit. Është  shkaku i parë i verbërisë në diabetikë. Gati 30% e pacientëve me diabet kanë zhvilluar retinopati.

Retina është shtresa e qelizave të ndjeshme ndaj dritës në pjesën e prapme të syrit që konverton dritën në sinjale elektrike. Sinjalet dërgohen në tru, i cili i kthen ato në imazhe. Këto imazhe në vijim ruhen dhe interpretohen. Retina, ashtu si çdo pjesë e trupit, ka nevojë për një furnizim të vazhdueshëm me gjak. Kjo realizohet përmes një rrjeti enësh të vogla gjaku. Me kalimin e kohës, një nivel i vazhdueshëm i lartë i sheqerit në gjak mund të dëmtojë këto enë.

Dëmtimi kalon në tre faza kryesore:

Retinopatia e sfondit – fryrje të vogla zhvillohen në enët e gjakut, të cilat mund të rrjedhin pak gjak, por zakonisht nuk ndikojnë në shikim.

Joproliferative – ndryshimet më të rënda dhe më të përhapura ndikojnë në enët e gjakut, duke përfshirë gjakderdhje më të konsiderueshme në sy.

Proliferative – formohen enë të reja gjaku, të cilat janë të dobëta dhe rrjedhin lehtësisht.

Faktorët e riskut për zhvillimin e retinopatisë

Çdokush me diabet tip 1 ose diabet tip 2 është potencialisht në rrezik të zhvillimit të retinopatisë diabetike.

Rreziku për pacientët rritet nëse kanë:

• diabet për një kohë të gjatë
• një nivel të vazhdueshëm të lartë të sheqerit në gjak (glicemi).
• kanë presion të lartë të gjakut
• kolesterol të lartë
• shtatzani
• prejardhje aziatike ose afro-karaibe

Shenjat nuk janë gjithmonë të dukshme. Gradualisht individi me retinopati zhvillon përkeqësim të shikimit, njolla që notojnë në fushën e shikimit, vizion i paqartë ose i njollosur, dhimbje ose skuqje të syve, vështirësi për të parë në errësirë. Ndonjëhere, ndonëse rrallë, shenja e parë është humbja e menjëhershme e shikimit.

Kush duhet të kontrollohet për retinopati dhe sa shpesh ?

Të gjithë pacientët me diabet duhet të kontrollojnë sytë.

Të rriturit me diabet të tipit 1 duhet të kenë një ekzaminim fillestar të zgjeruar të syve brenda 5 viteve pas fillimit të diabetit.

Pacientët me diabet të tipit 2 duhet të kenë një ekzaminim në kohën e diagnozës.

Nëse nuk ka dëshmi të retinopatisë për një ose më shumë ekzaminime vjetore të syrit, atëherë mund të merren parasysh ekzaminimet çdo 2 vjet. Po ekzistoi ndonjë nivel i retinopatisë diabetike, ekzaminimet duhet të përsëriten të paktën çdo vit. Në rast se retinopatia është duke përparuar ose kërcënuese për shikimin, atëherë ekzaminimet do të kërkohen më shpesh (çdo 2, 4 ose 6 muaj).

Kontrolli i shpeshtë te endokrinologu dhe okulisti parandalon dhe trajton më së mirë problemet e shikimit të lidhura me diabetin.