Kanceri i stomakut e ka fillesën nga qelizat e shtresës së brendshme (mukoza) të stomakut. Sëmundja kryesisht zhvillohet ngadalë, për disa vite. Me zhvillimin e sëmundjes, qelizat tumorale përhapen në gjithë shtresat e stomakut dhe mund të prekin limfonodujt dhe organet përreth si mëlçinë dhe pankreasin.

Nga se shkaktohet kanceri i stomakut?

Të gjithë njerëzit mund të zhvillojnë kancer stomaku, por ka disa faktorë që na bëjnë më shumë të riskuar. Faktorët e riskut që rrisin probabilitetin për zhvillim të kancerit të stomakut janë:

• Mosha mbi 65 vjeç
• Historia familjare
• Duhanpirja
• Konsumi i alkoolit
• Obeziteti
• Infeksioni me Helicobacter Pylori
• Gastriti, GERD
• Konsumi i tepruar i kripës, ushqimeve të tymosura dhe turshive
• Dieta e varfër në fruta dhe perime
• Personat me grup gjaku A
• Infeksioni me virusin Epstein-Barr (EBV)
• Ekspozimi ndaj azbesit, qymyrit dhe gomës.

Cilat janë simptomat e kancerit të stomakut?

Kanceri i stomakut zakonisht nuk shfaq simptoma në stadet e hershme të sëmundjes. Edhe shenjat më tipike të tij, si rënia në peshë dhe dhimbja e stomakut shfaqen kur sëmundja është më shumë e avancuar.

• Nauze/të vjella
• Djegie ne stomak/urth
• Humbje të oreksit
• Rënie në peshë
• Lodhje
• Fryrje barku
• Të vjella me gjak (në stadet e avancuara)
• Feçe me ngjyrë të zezë

Shumë prej këtyre simptomave janë të shpeshta edhe në gjendje të tjera shëndetësore dhe jo gjithmonë janë shenjë e kancerit të stomakut. Konsultohuni me një mjek për të kuptuar shkakun e simptomave tuaja.

Si diagnostikohet kanceri i stomakut?

Disa ekzaminime mund të nevojiten në diagnostikimin e kancerit të stomakut, si:

• Endoskopia (gastroskopia) – vendosja e një sonde të hollë dhe fleksibël e cila bën të mundur eksplorimin e stomakut dhe marrjen e biopsisë në rastet kur evidentohen lezione të dyshimta.
• CT skaner/MRI/Eko abdominale – vizualizon organet e brendshme dhe jep informacion për shtrirjen e sëmundjes.
• Analiza gjaku
• Biopsia – gjatë endoskopisë mund të merret një mostër nga lezioni dhe më pas të vlerësohet me mikroskop për evidentimin e qelizave malinje.

Si trajtohet kanceri i stomakut?

Trajtimi i kancerit të stomakut varet nga stadi i sëmundjes, gjendja e përgjithshme dhe preferencat e pacientit.

Në rastet kur kanceri i stomakut është i kufizuar në stomak, kirurgjia është modaliteti kryesor i trajtimit.

Modalitete të tjera trajtimi të cilat mund të jenë të kombinuara ose jo me kirurgjinë janë:

• Radioterapia
• Kimioterapia
• Imunoterapia

Si mund të parandalohet kanceri i stomakut?

Mjekoni infeksionet e stomakut.

Nëse vuani nga ulçera e stomakut të shkaktuar nga infeksioni H. Pylori, duhet të merrni mjekim. Trajtimi për infeksionin e H.Pylori kombinon antibiotikët të cilat eliminojnë bakteret me barna të tjera të cilat rigjenerojnë qelizat e dëmtuara të stomakut.

Ushqehuni shëndetshëm

Dieta duhet të jetë e pasur me fruta dhe perime. Ato janë të pasura me fibra dhe vitamina të cilat ulin riskun për kancer të stomakut. Shmangni ushqimet e kripura, tymosura dhe turshi. Ruani një peshë të shëndetshme. Obeziteti rrit riskun për kancer të stomakut.

Mos pini duhan

Risku i kancerit të stomakut është 2 herë më i madh në duhanpirës.

Është kanceri i stomakut i kurueshëm?

Kanceri i stomakut është i kurueshëm nëse diagnostikohet në stad të hershëm të sëmundjes. Por në shumicën e rasteve, diagnostikimi ndodh kur sëmundja është e avancuar. Për të bërë një vlerësim më të mirë të prognozës së sëmundjes, onkologu shqyrton të dhënat mbi stadin e sëmundjes, llojin histopatologjik dhe të dhëna molekulare të tumorit.