Si ta vlerësojmë shkallën e hirsutizmit? Për ta vlerësuar përdoret një sistem pikëzimi i quajtur Ferriman-Gallwey.

Ai bazohet në sistem vlerësimi (me pikë nga një deri në katër) të qimëzimit në zona androgen-sensitive (buza e sipërme, mjekra, krahët, kraharori, shpina, fundshpina, kofshët dhe rregjoni pubik) siç tregohet në skemën më poshtë.

Hirsutizëm gjatë moshës fertile konsiderohet një pikëzim ≥8. Megjithatë ky kufi varet nga etniciteti.

Sistemi është i limituar nga fakti që shumë paciente në momentin që paraqiten te mjeku kanë shkuar drejt proceseve të depilimit të përkohshëm ose permanent.

Hapat që pasojnë shkallën Ferriman – Gallwey

Pasi është vendosur diagnoza e hirsutizmit ndiqen disa hapa për të përcaktuar ndjekjen.

• Përcaktimi nese pacienti është duke marrë medikamente që mund të kenë si efekt shtimin e pilozitetit.
• Identifikimi ose përjashtimi i PCOS, pasi është i pranishëm në 75-80% të femrave të cilat paraqiten me hirsutizëm.
• Identifikimi i patologjive te tjera shkaktare të mundshme të hirsutizmit dhe përshtatja e trajtimit.
• Përcaktimi i gradës së stresit emotiv të shkaktuar nga hirsutizmi.
• Me rëndësi të madhe është përcaktimi i periudhës kohore të shfaqjes së simptomave.

Çfarë tjetër ka rëndësi në vlerësimin e hirsutizmit?

Ekzaminimi fizik duhet të përcaktoj praninë e shenjave të virilizimit (hiperandrogjenizëm sever) ose gradës së hirsutizmit.

Sipas protokolleve te Shoqatës Europiane të Endokrinologjisë është vendosur që të bëhet një matje e testosteronit total në të gjitha femrat me një pikëzim anormal të hirsutizmit. Kjo nuk vlen për femrat që kanë një cikël të rregullt menstrual dhe me flokë të padëshiruar.

Historiku menstrual –Hirsutizmi mund të shoqërohet shpesh me cikël të çrregullt menstrual, me përjashtim të rasteve të hirsutizmit idiopatik.

Anamneza familjare – histori familjare për hirsutizëm, akne, cikël menstrual të çrregullt, infertilitet, sëmundje kardiovaskulare, obezitet.

Historia e peshës trupore – femrat obeze kanë një sekretim më të lartë të androgjeneve.

Etnia – luhat pikëzimin e hirsutzmit sepse etni të ndryshmë kanë shkallë normale të ndryshme të qimëzimit.

Ekzaminimet më të detajuara konsistojnë në matjen e androgjenëve në gjak dhe eko pelvike. në varësi të tyre shikohet mundësia për eksplorime të mëtejshme.