Hemoglobina është një proteinë që gjendet në rruazat e kuqe të gjakut. Përveç transportit të oksigjenit në gjak, hemoglobina transporton edhe dioksidin e karbonit nga qelizat për në mushkëri. Niveli i ulët i hemoglobinës ose anemia e bën të vështirë kryerjen e këtyre proceseve shumë të rëndësishme për trupin. Më poshtë do të gjeni disa mënyra se si të rrisni nivelin e hemoglobinës.

Merrni më shumë hekur

Nëse niveli i ulët i hemoglobinës është shkaktuar nga mungesa e hekurit, ngrënia e ushqimeve të pasura me hekur mund të ndihmojë. Hekuri ndihmon prodhimin e hemoglobinës, si dhe të rruazave të kuqe të gjakut. Ushqimet e pasura me hekur janë:

• Mishi dhe peshku
• Produktet e sojës, tofu dhe edamame
• Vezët
• Frutat e thata si hurmat e arabisë dhe fiqtë
• Brokoli
• Jeshillëqet si spinaqi ose kale
• Bizelet
• Arrat dhe farat
• Gjalpi i kikirikut

Merrni më shumë folate

Folatet janë një lloj vitamin B, që luan një rol të rëndësishëm në prodhimin e hemoglobinës. Trupi i përdor folatet për të prodhuar hemin, një element përbërës i hemoglobinës që ndihmon në transportin e oksigjenit.

Mungesa e folateve mund të pengojë maturimin e rruazave të kuqe të gjakut, çka mund të çojë në anemi.

Ushqime të pasuara me folate janë:

• Mishi i vicit
• Spinaqi
• Orizi
• Kikirikat
• Fasulet
• Avokadot
• Lakra

Folatet  mund të merren edhe në formën e suplementeve ushqimore, të cilat mund t`i bleni online këtu.

Maksimizoni përthithjen e hekurit

Marrja e hekurit me anë të ushqimit ose suplementeve është e rëndësishme, por duhet të kujdeseni edhe për përthithjen e hekurit në organizëm. Ushqimet e pasura me vitamin C, si portokalli, limoni, luleshtrydhet dhe jeshillëqet nxisin përthithjen e hekurit në organizëm. Marrja e vitaminës C bashkë me hekurin gjithashtu ndihmon.

Vitamina A dhe beta-karoteni mund të ndihmojë përthithjen dhe përdorimin e hekurit nga organizmi.

Ushqime të pasura me vitaminë A janë:

• Peshku
• Mëlcia
• Kungulli
• Patate e ëmbël
• Kale

Ushqimet e pasura me beta-karoten janë:

• Karrotat
• Patate e ëmbël
• Kungulli
• Mango

Duhet theksuar se edhe pse suplementet me vitaminë A ndiihmojnë trupin të përpunojë hekurin, kjo vitaminë është e dëmshme nëse merret në sasi të lartë. Mbidoza e vitaminës A shkakton një gjendje të njohur si hipervitaminoza A. Simptomat mund të jenë dhimbje kockash dhe artikulacionesh, dhe dhimbje e fortë koke.

Merrni suplemente të hekurit

Nëse keni nivel shumë të ulët të hemoglobinës, mjeku mund t`ju rekomandojë të merrni suplemente të hekurit.

Është e rëndësishme të theksohet se shumë hekur mund të jetë i dëmshëm. Mund të shkaktojë simptoma si konstipacioni, nauze dhe të vjella. Në disa raste mund të shkaktojë një gjendje të njohur si hemokromatoza.

Suplementet e hekurit rrisin nivelin e hekurit gradualisht, zakonisht për pak javë. Në disa raste mjeku mund t`ju rekomandojë t`i merrni këto suplemente për disa muaj, për të rritur depozitën e hekurit në organizëm.

Çfarë quajmë nivel normal të hemoglobinës?

Niveli i hemoglobinës matet me anë të analizës së gjakut. Nivel i ulët i hemoglobinës në burra konsiderohet më pak se 13.5 g/dL, ndërsa nivel i ulët i hemoglobinës në gra konsiderohet më pak se 12 g/dL.

Me këshillat e mjekut, niveli i hemoglobinës  mund të arrijë normën, e cila është:

• 13.5 – 17.5 g/dL për burrat
• 12 – 15.5 g/dL për gratë

Niveli i normës për hemoglobinën për fëmijët varet nga mosha. Ndaj është e rëndësishme të flsini me mjekun për të marrë rekomandimin e duhur.

Cilat mund të jenë simptomat që shkakton niveli i ulët i hemoglobinës?

Simptomat që mund të shkaktojë niveli i ulët i hemoglobinës ose anemia janë:

• Rrahje të shpeshta të zemrës
• Zbehje të lëkurës dhe mukozave
• Lodhje
• Dobësi muskulore
• Dhimbje koke

Çfarë e shkakton aneminë – nivelin e ulët të hemoglobinës?

• Mungesa e hekurit, folateve ose vitaminës B12
• Gjakderdhja
• Kancer/Leucemia
• Sëmundjet e veshkave
• Sëmundjet e mëlcisë
• Hypotiroidizmi
• Talasemia
• Sëmundjet e mushkërisë

Mbani mend

• Në shumë raste, niveli i hemoglobinës mund të rritet me ndryshime në dietë dhe me suplemente. Për dozimin e suplementeve duhet të merrni gjithmonë rekomandimin nga mjeku.
• Në disa raste, kur niveli i hemoglobinës eshte shumë i ulët, mund të rekomandohen transfuzionet e gjakut ose trajtime të tjera.
• Në varësi të shkakut të anemisë dhe llojit të trajtimit, rikthimi i hemoglobinës në nivelet e normës mund të kërkojë kohë të gjate, në disa raste edhe rreth 1 vit.